Waasi wanaoungwa mkono na Rwanda walifika katikati mwa jiji la pili kwa ukubwa mashariki mwa DRC, Bukavu, jana Jumapili asubuhi na kuchukua udhibiti wa ofisi ya utawala wa jimbo la Kivu Kusini baada ya upinzani mdogo kutoka kwa vikosi vya serikali, ambavyo viliwakimbia waasi.

Wanahabari wa shirika la Associated Press walishuhudia wakazi wengi wakiwashangilia waasi wa M23 katikati mwa Bukavu, Jumapili asubuhi walipokuwa wakitembea na kuzunguka katikati ya jiji baada ya harakati za kusonga mbele za siku kadhaa kutoka mji mkuu wa eneo hilo wa Goma umbali wa kilomita 101, ambao waliuteka mwishoni mwa mwezi uliopita.

Sehemu kadhaa za jiji, hata hivyo, zilibaki kuwa tulivu huku wakazi wakijifungia majumbani mwao.

Waasi wa M23 ndio mashuhuri zaidi kati ya zaidi ya vikundi 100 vyenye silaha vinavyopigania udhibiti wa mashariki wenye utajiri wa madini ya DRC, na wanaungwa mkono na wanajeshi 4,000 kutoka nchi jirani ya Rwanda, kwa mujibu wa Umoja wa Mataifa.